Кыргыз Республикасынын эл артисти Болот Бейшеналиев менен СССРдин эмгек сиңирген артисти Наталья Аринбасарованын сүрөтү 1965-жылы Нарын облусунда тартылган.
Ошол жылы Чыңгыз Айтматовдун повестинин негизинде жаш режиссёр Андрей Кончаловский "Биринчи мугалим" тасмасын тарткан.
Ал кезди Кончаловский "Возвышающий обман" китебинде мындайча эскерип жазган.
"Тасманы тартуу алдында Кыргызстанга көп жолу саякаттадым. Себеби мен кыргыздын музыкасын, ой-толгоосун түшүнүүм керек болчу. Боз үйдө уктап, улуу акындардын чыгармаларын угуп, кымыз ичип жүрдүм. Башкы ролду аткарам деп сынакка келгендердин бирөө да мага жаккан жок. Кийин чыгармачыл топко режиссёрдун ассистенти болуп келген Болот Бейшеналиевди тандап алгам. Ал эми Алтынайдын образына кесипкөй актриса издебей, тескерисинче, жөнөкөй кыздарды караштыргам. Казакстандагы балет училищесинде билим алган бир нече кызды көрдүк. Ошолордун арасында Наталья Аринбасарова бар болчу, ал башында эле жаккан. Анан Кыргызстанга да келип, ошол эле ролго ылайыктуу кыздарды тандап көрдүк, бирок таппай коюп Аринбасаровага токтолгонбуз. "Биринчи мугалимди" тартуу өтө оор болгон. Күн аябай ысып, мен ден соолугума байланыштуу ооруп да калчумун. Соңунда тасма ошончолук олуттуу, күчтүү болот деп ойлогон эмесмин. Анткени ал эмгек менин дипломдук ишим эле болчу. Тарткан кадрлар бири-бирине чапталып, акырын куралып мааниси чыккан сайын кубангам", — деп жазган режиссёр.
Аталган тасма кийин сынчылардын купулуна толуп, Киевде өткөн Бүткүл союздук кинофестивалда "Советтик экран" журналынын атайын байгесине, Римдеги кинофестивалда "Капитолий Юпитери" сыйлыгына татыган. Ошондой эле Франциянын Йере шаарында өткөн жаш кинематографисттердин эл аралык фестивалында калыстар тобунун атайын байгесине ээ болгон.
