БИШКЕК, 19-фев. — Sputnik. Россиянын "Интер РАО" энергетикалык компаниясынын төрөгасы Дмитрий Волков "Камбар-Ата ГЭС-2" долбоорун ишке ашырууга кызыкдар экендигин билдирди.
Волков төртүнчү ирет өтүп жаткан "Гидроэнергетика. Борбордук Азия жана Каспий - 2020" аталышындагы конгресс-көргөзмөдө сүйлөгөн сөзүндө Орто Азиядагы мамлекеттердин ГЭСтерине карата долбоорлор иштелип жатканын айткан.
"Кыргызстандан КАГЭС-2ни байкаштырып жатабыз. Ал жакты Евразиялык өнүктүрүү банкы каржылай турганы маалым. Бул банк бизге бөтөн эмес, себеби Россия анын негизги акционери. Ошондой эле Үч-Коргон ГЭСин карап жатабыз. Бардыгы кыргыз тараптын позициясынан көз каранды", — деген Волков.
Белгилей кетсек, Евразия өнүктүрүү банкы "Камбар-Ата ГЭС-2" гидроагрегаты үчүн 110 миллион доллар бөлөт. Долбоор 2023-жылы ишке ашышы күтүлүүдө.
"Бирок биз бул жаатта көйгөйгө кабылып, чече алган эмеспиз. Кыргыз тарап курулуш тууралуу келишимди жокко чыгарды, ал эми Россияда бүгүнкү күнгө чейин жокко чыгарылган жок", — деди Волков.
Ал белгилегендей, Орто Азияда долбоорлорду ишке ашыруунун негизги көйгөйү өз милдеттерин аткарбагандык болуп саналат.
