БИШКЕК, 17-фев. — Sputnik. Аймактар аралык кастыкты козутууга шектелип 23 жаштагы С.Э. аттуу блогер кармалды. Бул тууралуу Бишкектин Октябрь райондук ички иштер башкармалыгынын маалымат кызматы кабарлады.
Билдирүүгө ылайык, блогерге карата Жазык кодексинин 313-беренеси ("Аймактар, улуттар аралык же диний, этникалык жана расалык кастыкты козутуу") боюнча сотко чейинки өндүрүш ачылган.
Анын алкагында Октябрь РИИБдин ыкчам кызматкерлери бүгүн, 17-февралда, шектүүнү кармап, тергөө кызматына алып келген. Андан соң Бишкек шаардык милициянын убактылуу кармоочу жайына киргизилгени айтылат.
Азыркы тапта сотко чейинки өндүрүштүн алкагында тергөө жүрүп жатат.
