БИШКЕК, 5-фев. — Sputnik. Россиянын президенти Владимир Путин Череповец шаарына болгон иш сапарында кортежин токтотуп, жол жээгинде турган жашоочулар менен учурашты. Бул тууралуу РИА Новости жазды.
Окуя 4-февраль күнү болуп, жеринде тартылган видео YouTube тармагына жүктөлгөн.
Президенттин келерин билген эл азык-түлүк саткан дүкөндүн алдына чогулган. Путин аларды көрүп, автоунаасынан түшүп ал-жай сурашты. Жакын жерде тургандардын колун кысып, бир-эки соболго жооп бергенге дагы үлгүрдү.
Мындан соң президент чогулган элди карап, суукка урунуп албай, ден соолукка жакшылап көңүл бурууга чакырды.
"Суукту карагылачы, тоңуп калбагыла!" — деди ал.
Көп өтпөй президент автоунаасына отуруп, жолун улады.
Шейшемби күнү Владимир Путин Күрөш өнөрү боюнча борбор менен Химия-технологиялык колледжди көргөнү Череповец шаарына барган.
