БИШКЕК, 4-фев. — Sputnik. Улуттук банктын расмий курсуна ылайык, доллар 22-январдан бери 15 тыйынга кымбаттап, соңку күндөрү 69,85 сомго жетти.
Valuta.kg порталында доллардын курсу 21-январдан тарта өсө баштаган. Чет элдик валютаны сатып алуу 14 тыйынга жогорулап, 69,8 сомду көрсөтүп турса, долларды сатуу 10 тыйынга көтөрүлүп, 69,9 сомго барабар болуп калды.
Өнөктөш өлкөлөрдө абал кандай?
Лондондогу ICE биржасындагы сооданын жүрүшүндө Brent маркасындагы мунайдын баасы 1,1 пайызга төмөндөп, 56 долларды түздү.
Казакстанда дагы америкалык валюта 22-январдан тарта кымбаттаган. Доллардын куну 4,2 теңгеге жогорулап, 380,65ке бааланып калды.
Доллардын Кыргызстанда кымбатташынын себеби
Улуттук банк белгилегендей, "сезондук факторлорго байланыштуу алмаштыруу курсунун кескин толкундоолорун жөнгө салуу максатында" 31-январь күнү 31 миллион доллар сатылды. Бирок "сезондук фактор" эмне экени такталган эмес.
Акча алмаштыруу бюролорунун ассоциациясынын башчысы Чыңгыз Бийлибаев абалды кененирээк түшүндүрүп берди.
"Адатта январь айы ишкерлерибиз үчүн тынч сезон болот, бирок айдын аягында рынок жанданып, доллар менен төлөнгөн чет элдик товарларга буюртмалар түшө баштады. Америкалык валюта талаптын келип чыгышынан улам кымбаттады",— деди Ассоциациянын башчысы.
Ошондой эле доллардын Россияда кымбатташы да себеп катары аталышы мүмкүн, бирок бул негизги жүйө эмес, Бийлибаев негизгиси жогоруда айтылган жергиликтүү факторлор экенин белгиледи.
Доллар дагы кымбаттайбы?
Ассоциациянын башчысы тынчсызданууга негиз жок экенин айтып берди. Ал эске салгандай, акыркы эки жылдан бери доллардын курсу 69,9 сом деңгээлинде кармалып турат. Бүгүнкү күндө анын өсүшү үчүн шарт жок.
"Долларга тартыштык дагы жок, укмуш талап дагы жок", — деп түшүндүрдү Бийлибаев.
"Рыноктун белгилүү бир мезгилиндеги кырдаалга жараша валюта курсу жогорулап же төмөндөшү мүмкүн. Бул мыйзам ченемдүү көрүнүш", — деп белгилешти мекемеден.
Ошондой эле валюта рыногу дайыма көзөмөлдөнүп, курстун олку-солкулугун жөнгө салуу үчүн тиешелүү операциялар жүзөгө ашырылып турары кошумчаланды.
