Акун кызы: "Жети жаш автор" адабий сынагы 10 жылдан бери өтүп келет
"Жети жаш автор" адабий сынагы 2009-жылдан бери өтүп келет. Аталган убакыт аралыгында Интеллектуалдык менчик мамлекеттик фонду учурдагы бир топ аты чыккан жаш акын, жазуучулардын чыгармаларын китеп кылып, акысыз басып чыгарып берди. Бул тууралуу Динара Акун кызы Sputnik Кыргызстан радиосуна маек куруп жатып билдирди.
Анын айтымында, сынактын "Жети жаш автор" деп аталып калганынын биринчи себеби — аталган фонд бөлгөн каражаттын көлөмү туура жети эмгектин ар бирин 150 нускада китеп кылып басып берүүгө ылайыкталган.
"Жаш акын жана жазуучуларды колдоо максатында Интеллектуалдык менчик мамлекеттик фонду акыркы 10 жылдан бери "Жети жаш автор" адабий сынагын өткөрүп келет. Бул убакыт аралыгында Бердибек Жамгырчиев, Мирлан Алтымыш уулу, Айсулуу Эсен кызы, Венера Акматова, Данияр Исанов өңдүү бир катар жаш калемгерлер аталган конкурстун жеңүүчүсү деп табылып, чыгармалары китеп болуп басылып чыккан. Жылдан-жылга сынакка болгон кызыгуу артып, келген эмгектердин саны менен сапаты да жогорулап жатат. Быйылкы иш-чара 2019-жылдын сентябрь айында старт алган. Ал 2020-жылдын 30-январына чейин созулат. Конкурстун шарты боюнча, жаш авторлордун эмгектери мурун эч жерде жарыяланбаган, жаңы чыгарма болуусу талап. Ошондой эле мурунку жылдардагы "Жети жаш автор" сынагына катышкандар кайрадан эмгектерин жибере алышпайт", — деди Акун кызы.
Ал Интеллектуалдык менчик мамлекеттик фонду учурда "Саамалык" аттуу конкурс уюштурууну пландап жатканын айтып, ага мектеп жашындагы калемгерлерден тарта 35 жашка чейинки курактагы акын жана жазуучулар катыша аларын кошумчалады.
