БИШКЕК, 18-янв. — Sputnik. Бишкекте жаңы жылдык балатыларды жана кооздуктар 20-январдан баштап алынарын мэриянын маалымат кызматы билдирди.
Муниципалитет майрамдоонун жыйынтыгын чыгарды:
- чыгымдарды оптималдаштырууга мүмкүнчүлүк болуп, жаңы жылдык кооздоого корогон акча 5,4 миллион сомго жетти;
- мэрия баарын өз күчү менен жасоого аракеттенген. Мисалга, майрамдык такталарга Капиталдык курулуш башкармалыгы 826 миң сом сарптады. Инсталляция "Бишкекжарык" ишканасынын цехинде жасалды;
- башкы балаты 960 миң сомго турду. Бул былтыркыга караганда 1,4 миллионго арзан;
- жаңы жылдык кооздуктар, конструкциялар сакталып, эмдиги жылы да колдонууга берилет.
Мэриядан билдиргендей, бөлүнгөн акча декорациядан тышкары шоу-программаларга жана башка иш-чараларга да сарпталган.
"Мэрия ошону менен катар электр энергиясына, жабдыктарга, үн аппараттарына, фото жана видеоархивге, сахнанын монтаж жана демонтажына, анын көркөм жасалгасына, 20 биотуалеттин коюлушуна, фейерверктерге, транспортко, иш-чарага чейинки жана андан кийинки тазалоо иштерине акча төлөйт", — деп жазылат билдирүүдө.
Муниципалитет жылдан-жылга чыгымдар азаярына сөз берди.
