Корккон, кубанган залкар актер. Орозбек Кутманалиевдин сүрөттө калган ирмемдери
Корккон, кубанган залкар актер. Орозбек Кутманалиевдин сүрөттө калган ирмемдери
Sputnik Кыргызстан
Мындан 15 жыл мурда, 3-январда актер, режиссер, төкмө акын, обончу, дастанчы Орозбек Кутманалиев мезгилсиз дүйнөдөн кайткан. Sputnik Кыргызстан агенттиги көп... 03.01.2020, Sputnik Кыргызстан
Мындан 15 жыл мурда, 3-январда актер, режиссер, төкмө акын, обончу, дастанчы Орозбек Кутманалиев мезгилсиз дүйнөдөн кайткан. Sputnik Кыргызстан агенттиги көп кырдуу залкарды эскерип, анын сүрөттө калган ирмемдерин сунуштайт.
Орозбек Кутманалиев 1932-жылы 10-майда Чүй облусунун Сокулук районундагы Шалта айылында жарык дүйнөгө келген. Ыр-күүгө жакын өспүрүм мектепте окуп жүргөндө эле элдик чыгармачылыкка жакын болгон. Кийин бойго жеткенде эмгек жолун борбор калаадагы Куурчак театрынан баштап, 1965-жылдан тарта Токтогул Сатылганов атындагы улуттук филармонияда солист, 1969-жылы Кыргыз телекөрсөтүү жана радиоуктуруу комитетинде режиссёр, диктор болуп эмгектенген.
Кыргыз Республикасынын эл артисти өзүнүн чыгармачылык жолунда "Ак кеме", "Эрте келген турналар", "Ак мөөр", "Бөрү зындан", "Махабат дастаны" өңдүү 20га жакын фильмде образ жараткан.
Жеке жашоосунда Кутманалиев радиодо иштеп жүргөн кезинде колуктусунан айрылып, беш бала менен жалгыз калган. Кийин кесиптешине үйлөнүп, алты балалуу болгон. Жубайлар 35 жыл чогуу жашап алты кыз, беш уулду тарбиялаган. Залкар артист 15 жыл мурда оорудан улам 73 жашында көз жумган. Быйыл анын көзү тирүү болгондо 88 жашка толмок.
