БИШКЕК, 25-дек. — Sputnik. Акыркы үч жылда паспорт алгандар жана аны жоготкондордун саны көбөйдү. Бул тууралуу Мамлекеттик каттоо кызматынан (МКК) билдиришти.
Ага ылайык, МКК алдындагы "Инфоком" ишканасы соңку үч жылда 3 миллионго чукул паспорт даярдаган. Аталган статистикага документтин бардык түрү кирет. Алар жарандык, дипломатиялык, кызматтык паспорттор, ошондой эле 2004-жылы жаңы үлгү менен чыккан ID-карт менен 2017-жылдагы үлгүдөгү eID-карттар болуп саналат.
Кыргызстандык жарандарга даярдалган паспорттордун саны жыл сайын өсүп жатканы белгиленет. Маселен, 2017-жылы 901 паспорт даярдалса, кийинки жылы 916 паспорт жекелештирилген. Ал эми үстүбүздөгү жылдын 11 айында 950дөн ашык паспорт берилген.
Ошону менен биргеликте паспортторду жоготкондордун да саны өскөн. Үч жылда 160 миң паспорт жоголуп, 12 миңден ашыгы документ даярдоодо жараксыз деп табылган.
Мамлекеттик каттоо кызматы жарандарды өздүгүн тастыктаган негизги документке кылдат мамиле кылууга чакырды.
