БИШКЕК, 23-дек. — Sputnik. Бишкек — Ош жолунда оор жүк ташуучу жана жеңил автоунаалардын каттамына чектөө киргизилген жок. Бул туурасында Транспорт жана жолдор министрлигинен кабарлашты.
Кеп биринчи иретте Төө-Ашуу, Ала-Бел жана Өтмөк сыяктуу ашуулар туурасында болууда.
Министрликтен Көлбаев атындагы туннелдин кире беришинде кар тозоңу учуп, жолчулар аталган аймакты улам-улам тазалап жаткандыгын билдиришти. Учурда көк жалтаң муз болуп калбас үчүн туз жана кум сээп жаткандыктарын айтышты.
Кечээ кечинде кечки саат жети жарымдан тарта Бишкек — Ош жолундагы автокыймылга чектөө коюлуп, кардын катуу жааганынан улам жол тайгалак болуп, автотыгын жаралган.
