ИИМ: Ширин Айтматованын күйөөсү дагы бир кылмыш ишинде фигурант

БИШКЕК, 20-дек. — Sputnik. ЖКнын мурдагы депутаты Ширин Айтматованын жарандык никедеги күйөөсү Сыргак Кенжебаев аткезчиликке байланыштуу бир иште фигурант катары жүрөт. Бул тууралуу ИИМдин маалымат кызматынан билдиришти.

Ушул жылдын ноябрь айында жергиликтүү ЖМКлар Виктор Гавришев аттуу кыргызстандыктын кайрылуусун жарыялаган. Анда уулу Егор Гавришев жана башка кишилерге мыйзамсыз кылмыш иши козголуп, жалаа жабуу болуп жатканы айтылган. Гавришев буга Бишкек ШИИБинин тергөөчүсү Урмат Баялиев, Айтматованын жолдошу Сыргак Кенжебаев жана Россия жараны Сергей Богдановдун тиешеси бар экенин билдирген.

ИИМ кеп 2013-жылы "Кызмат абалынан кыянаттык менен пайдалануу" жана "Шалаакылык" беренелери менен козголгон иштер жөнүндө болуп жатканын айткан. Материалдарда Егор Гавришев 2012-жылдын январынан 2013-жылдын февралына чейин 808 миң долларлык 810 даана спутник телефонун алып кирип, 20,2 миллион сом бажы төлөмүн төлөбөй койгону айтылган. Документтердин копиясын россиялык Сергей Богданов аттуу жаран берген.

Көп өтпөй Егор Гавришевге "Аткезчилик" жана "Бажы төлөмдөрүнөн качуу" беренелери менен кылмыш иши козголгон. Быйылкы жылдын 19-февралында аны "Манас" аэропортунан кармап, үй камагына алышкан.

"Иштин жагдайларын адилет карап чыгуу жана Сыргак Кенжебаев тарабынан мыйзам бузуу болгон же болбогондугун аныктоо үчүн сотко чейинки өндүрүш иштери ИИМдин тергөө кызматы тарабынан жүргүзүлүп жатат. Анын жыйынтыгы менен процессуалдык чечим кабыл алынат", — деп айтылат билдирүүдө.

Эске салсак, кечээ кечинде УКМК Ширин Айтматованын жолдошу Сыргак Кенжебаевди алдамчылыкка шектүү катары кармаган. Маалыматка караганда, УКМКга кытай жараны 350 миң долларын Сыргак Кенжебаев аттуу кыргызстандык адамга алдатып жибергенин айтып кайрылган.