БИШКЕК, 18-дек. — Sputnik. Мурдагы президент Алмазбек Атамбаев УКМКнын атайын даярдыктагы кызматынын башчысы Үсөнбек Ниязовдун өлүмүнө шектелип жатат. Бул тууралуу ИИМден билдиришти.
Маалыматта Атамбаевдин адвокаты Замир Жоошев жергиликтүү ЖМКлардын бирине мурдагы мамлекет башчы киши өлтүрүүгө шектелип жатканы боюнча расмий айтыла электиги боюнча маалымат бергени белгиленген.
"Буга байланыштуу ИИМ Алмазбек Атамбаевге Үсөнбек Ниязовдун өлүмүнө шектелип жатканы боюнча расмий түрдө билдирме берилгенин маалымдайт", — дешти ИИМден.
Эскерте кетсек, үстүбүздөгү жылдын 7-августунда Кой-Таш айылында УКМКнын атайын даярдыктагы аскери Алмазбек Атамбаевди кармоого аракет кылып, бирок ага мурдагы президенттин тарапташтары каршылык көрсөтүп ишке ашкан эмес.
Эртеси, 8-августта, укук коргоо органдары кайрадан операция жүргүзүп, Атамбаев багынып берген.
Эки күндөгү чыр-чатактан жалпысынан 136 киши ар кандай жаракат алган.
