Күч түзүмдөрү жоопко тартылабы? Кой-Таш окуясын иликтеген комиссиянын сунуштары

БИШКЕК, 10-дек. — Sputnik. Кой-Таш окуясы боюнча иликтеген мамлекеттик комиссия өкмөт менен Башкы прокуратурага бир нече сунуштарды берди.

Бүгүн Жогорку Кеңештин Укук тартиби, кылмыштуулук менен күрөшүү жана коррупцияга каршы аракеттенүү боюнча комитети мамкомиссиянын корутундусун жалпы жыйындын кароосуна жөнөттү. Комитетке комиссиянын мүчөсү, депутат Тынчтык Шайназаров баяндама жасады.

"Биз окуянын тарыхына үңүлүп, себептерин карап чыктык. Мурдагы президент жана тарапташтары тарабынан мыйзам бузуулар аябай көп болгон. УКМКнын жоопкерчилиги каралат, себеби аларда координация жок болгондуктан кызматкерлер жаракат алып, көз жумду. Биз премьер-министрге жана Башкы прокуратурага күч түзүмдөрүнүн ишинде кылмыштын белгилери болсо жоопкерчиликке тартууну сунуштадык", — деди Шайназаров.

Өкмөткө берилген сунуштар:

Алмазбек Атамбаевди тергөө органдарына мажбурлап алып келүүнүн натыйжасында УКМК кызматкери каза болгон жана ички иштер органдарынын, атайын кызматтын аскерлери, ошондой эле жай тургундар ар кандай жаракат алган. Бул боюнча күч түзүмдөрүнүн жетекчилеринин жана айрым кызматкерлеринин жоопкерчилиги каралсын;

Тиешелүү аймакта укук тартибин жана коопсуздукту камсыз кылуу жаатында жергиликтүү органдардын иш-аракеттери иликтенсин;

Кой-Таш окуясында жаракат алган жарандарга белгиленген тартипте материалдык, медициналык жана башка жардам көрсөтүлсүн.

Башкы прокуратурага берилген сунуштар:

Кой-Таш айылында 7-8-августта болгон окуяларга байланыштуу жазык иштерин ар тараптуу жана объективдүү иликтөө жүргүзүүгө талаптагыдай көзөмөлдөөнү камсыз кылсын;

Окуяны иликтөө учурунда процесстик иш-аракеттердин жазык-процесстик мыйзамдарына ылайык келүү жүйөсүн иликтесин;

Алмазбек Атамбаевди тергөө органдарына мажбурлап алып келүү үчүн "Альфа" атайын даярдыктагы бөлүктү тартуунун мыйзамдуулугу жана негиздүүлүгү иликтенсин. Натыйжасы боюнча тиешелүү кызмат адамдарынын иш-аракетине укуктук баа берилсин;

Окуя болор алдында тиешелүү прокурорлор жана укук коргоо органдарынын кызматкерлери укук бузуулардын алдын алуу жана бөгөт коюу иш-чараларын жүргүзбөгөнүнө укуктук баа берсин.

Эскерте кетсек, үстүбүздөгү жылдын 7-августунда Кой-Таш айылында УКМКнын атайын даярдыктагы аскери Алмазбек Атамбаевди кармоого аракет кылып, бирок ага мурдагы президенттин тарапташтары каршылык көрсөтүп ишке ашкан эмес. Мунун кесепетинен атайын даярдыктагы кызматтын башчысынын орун басары Үсөнбек Ниязбеков каза болуп, бир нече жоокер барымтага алынган. Эртеси, 8-августта, укук коргоо органдары кайрадан операция жүргүзүп, Атамбаев багынып берген.

Эки күндөгү чыр-чатактан жалпысынан 136 киши ар кандай жаракат алган.