БИШКЕК, 5-дек. — Sputnik. Жалал-Абад облусунда 18 жаштагы жигиттин өмүрүнө кол салган деген шек менен аны менен тең чамалаш улан жана кыз кармалды. Бул тууралуу аталган облустун милициясынын маалымат кызматынан билдиришти.
2019-жылдын 9-ноябрында саат 11:30дар чамасында Жалал-Абад облустук биргелешкен клиникалык ооруканасына жаш жигитти оор абалда алып келишкен.
![Жалал-Абад: 18 жаштагы жигиттин өлүмүнө шектелип кыз жана улан кармалды. Сүрөт Жалал-Абад: 18 жаштагы жигиттин өлүмүнө шектелип кыз жана улан кармалды. Сүрөт - Sputnik Кыргызстан](https://sputnik.kg/img/104642/89/1046428902_0:0:995:623_600x0_80_0_0_524b8c00bf78df471d7c8dfd450a8b38.jpg)
"Белгисиз адамдар жаш жигитти учтуу буюм менен ич тарапка сайган. Ал жандандыруу бөлүмүнө жаткырылып, маалымат милицияга билдирилген. Жабырлануучуга 2 сааттан ашуун операция жасалып, ошол эле түнү эс-учуна келбей каза болгон", — деп айтылат маалыматта.
"Тартип коргоо органдары 19 жаштагы У.Д. аттуу эркек баланы жана 17 жаштагы Н.А. аттуу кызды шектүү катары кармап, убактылуу кармоочу жайга киргизген", — деп айтылат маалыматта.
Тиешелүү материалдар чогултулуп Кылмыштардын жана жоруктардын бирдиктүү реестрине каттоого алынып, Жазык кодексинин 39-беренеси ("Кылмышка аракеттенүү"), 130-беренеси ("Киши өлтүрүү") менен сотко чейинки өндүрүш иши ачылган.