БИШКЕК, 3-дек. — Sputnik. Бишкек мэриянын Муниципалдык менчик башкармалыгы үч бала бакчаны шаардын балансына кайтарды. Бул тууралуу мэриянын маалымат кызматынан кабарлашты.
Ага ылайык, кайтарып алынган бала бакчалардын баары тең Бишкек шаарында жайгашкан. Айрымдарын мамлекеттик мекемелер колдонуп келген.
Өкмөттүн октябрь айындагы токтому менен №11 кичирайондо жайгашкан эки кабаттуу имарат муниципалдык менчикке берилди. Учурда аны мэриянын атына каттатуу аракеттери көрүлүүдө. Буга чейин анда Кыргызпатенттин кеңсеси жайгашып келген. Алар имаратты жыл башында бошоткон. Аны бала бакчага ылайыктоо үчүн шаардык бюджеттен 14 миллион сом бөлүнгөн. Оңдоо иштери аяктаса 200 бала кабыл алынат.
Андан сырткары, Чокморов, 253 дарегинде жайгашкан дагы бир бала бакча мэрияга өттү. Бул имарат буга чейин деле бала бакча болуп иштеп келген.
Мэриянын маалымат кызматынын кабарлашынча, Муниципалдык менчик башкармалыгы буга чейин башкаларга берилип кеткен билим берүү мекемелерин кайтаруу аракеттерин көрө бермекчи.
