БИШКЕК, 29-ноя. — Sputnik. Кыргызстан 2020-жылы Консультативдик жолугушууну өткөрүүгө даяр экенин Сооронбай Жээнбеков билдирди.
Белгилей кетсек, 29-ноябрда Ташкентте Борбор Азия мамлекет башчыларынын экинчи консультативдик жолугушуусу өттү. Ага Кыргызстандын, Тажикстандын, Түркмөнстандын жана Өзбекстандын президенттери катышты. Казакстандын атынан биринчи президент Нурсултан Назарбаев келди.
Жээнбеков өз сөзүндө Өзбекстандын президенти Шавкат Мирзиёевге жолугушууну уюштурганы үчүн ыраазычылыгын билдирди.
"Биз ишенимдүү маанайда аймактык кызматташтык маселелеринин кеңири спектри боюнча конструктивдүү диалог жүргүздүк. Белгиленген позитивдүү аракеттерди улантууну абдан маанилүү деп эсептейм. Буга байланыштуу Консультативдик жолугушууну Кыргызстанда 2020-жылы өткөрүүгө даярдык билдирем", — деди Жээнбеков.
Өзбекстандын президенти Шавкат Мирзиёев брифинг учурунда кийинки иш-чара кайда болорун тактап маалымат берген.
"Биздин кийинки консультативдик жолугушуу Кыргызстанда, кереметтүү Бишкек шаарында өтөт", — деди ал.
Белгилей кетсек, Биринчи консультативдик жолугушуу 2018-жылы 15-мартта Нур-Султанда (Казакстан) өткөн.
