БИШКЕК, 28-ноя. — Sputnik. Бишкекте өткөн ЖККУнун Жамааттык коопсуздук кеңешинин кезектеги сессиясы аяктап, президенттер үйлөрүнө кайтышты. Аларды премьер-министр Мухаммедкалый Абылгазиев узатты. Бул тууралуу өкмөттүн маалымат кызматынан билдиришти.
ЖККУга мүчө өлкөлөрдүн президенттери бүгүн, 28-ноябрда, "Ала-Арча" мамлекеттик резиденциясында тар чөйрөдө, андан соң кеңири форматта эл аралык жана аймактардын ортосундагы коопсуздук көйгөйлөрүн талкуулашты.
Жыйындын алкагында 15 документке кол коюлду.
ЖККУга мүчө өлкөлөр — Армения, Белоруссия, Казакстан, Кыргызстан, Россия жана Тажикстан. Уюмдун негизги максаты — аталган биримдикке кирген өлкөнү тышкы саясий агрессиядан, эл аралык террорчулуктан жана жаратылыш кырсыктарынан сактоо.
