Чокморова: СПИДди жеңүү үчүн алдыбызга 90-90-90 деген максат коюлган
Оорунун кан аркылуу жугушун токтотуу үчүн наркомандардын ийнелерин алмаштыруучу 19 бейөкмөт уюм иштейт. Түрмөлөрдө, үй-бүлөлүк дарыгерлер топторунда, СПИД борборлорунда 24 метадондук пункттар бар. Бул синтетикалык наркозатты ичсе бир сутка таасир берет. Бул тууралуу Үмүт Чокморова Sputnik Кыргызстан радиосунун эфиринде маек куруп жатып билдирди.
Анын айтымында, мурда эпидемияны аныктоого 6-7 ай талап кылынса, учурда шилекей же кан аркылуу эң көп дегенде эки жумада диагноз коюу мумкүнчүлүгү жаралды.
"СПИДге каршы эл аралык ЮНЭЙДС бирдиктүү программасы биздин алдыбызга 90-90-90 деген чоң максатты койгон. Биринчиси — 2020-жылдын аягына чейин ВИЧ/СПИД инфекциясын алып жүргөндөрдүн 90 пайызын аныкташыбыз керек. Экинчиси — ошол аныкталган бейтаптардын 90 пайызын дарылоого алуу керек. Андан кийин дарыланган бейтаптардын 90 пайызынын канынын курамында инфекция чыкпагыдай жыйынтыкка жетүү керек. Мындан улам Саламаттык сактоо министрлигинин буйругу менен ооруну тез аныктоочу ыкмаларды колдонуп жатабыз. Оорулуулар аныкталса, алар дарыланууга өтөт. Ал эми препаратты кабыл алган бейтап башка адамдарга оору жугузбайт да, канынын курамынан вирус чыкпай калат. Бизде учурда ар бир бейтап маалымат базасына киргизилген. Өлкөнүн ар кайсы аймактарындагы бейтаптар үч ай сайын анализ тапшырып турушат. Биз бул жакта туруп эле ким дарыларын ичпей жатканын билип алабыз", — деди Чокморова.
Дарыгер негизги көйгөйлөрдүн бири — ВИЧ-инфекциясы бар экенин билген бейтап дайынын билгизбей жоголуп же көчүп кеткен учурлар көп болорун, алар ооруну башкаларга жугузуп коюп жаткандарын кошумчалады.
