Акматова: чет өлкөгө барып сапаттуу билим алып келүү биз ойлогондон да жеңил
Бүгүнкү мезгилде чет мамлекетке барып, сапаттуу билим алып келүүгө бардык мүмкүнчүлүктөр бар. Бул тууралуу Айгерим Акматова Sputnik Кыргызстан радиосуна маек куруп жатып билдирди.
Анын айтымында, чет жактан билим алууну каалаган студенттер жана жогорку класстын окуучулары сөзсүз түрдө англис тилде эркин сүйлөп, сабактарын да мыкты окушу керек.
"Учурда башка мамлекетке барып билим алуу үчүн бардык мүмкүнчүлүктөр бар. Бирок бул тууралуу жаштардын көпчүлүгү билбейт экен. Муну эске алып, биз 2009-жылдан бери жыл сайын билим жарманкелерин уюштуруп келүүдөбүз. Тилекке каршы, ал да жетишсиз болуп жатат. Негизи чет жактан билим алууга мүмкүнчүлүк берген программалар көп. Аларды кеңири жайылтуу керек. Анткени биздин келечек муун да сапаттуу билим алууга укуктуу. Көпчүлүк жаштар чет жактан билим алуу өтө эле оор деп ойлошот. Иш жүзүндө андай эмес. Эң башкысы, англис тилинде эркин сүйлөп, сабактарды жакшы окуш керек. Анткени ал жакта аттестат жана дипломдогу бааларга чоң маани беришет ", — деди Акматова.
Ошондой эле ал билим жарманкелери өткөрүлө баштаганын, он жыл аралыгында Кыргызстандан 800дөй студент жана окуучу чет мамлекетке окууга жөнөтүлгөнүн кошумчалады.
