Россиянын Өзгөчө кырдаалдар министрлиги Красноярск крайындагы дамба жырылып, суу каптаган аймактардын бийиктиктен тартылган видеосун жарыялады. Дамбаны алып кеткен толкундун бийиктиги 4-5 метрге жетип, өзү менен кошо ылай, таш жана агындыларды агызып келген. Бул туурасында РИА Новости жазды.
Анда суу каптап, катуу агымдын алдында калган эбегейсиз аймакты, иштеп жаткан техникаларды, ылай басып калган жерлерди көрүүгө болот.
Азырынча алты кишинин тагдыры белгисиз бойдон калууда. Куткаруучулар аларды издеп жатышат.
Тергөө комитети ишти алып барууда техникалык коопсуздук эрежелерин бузгандыгы үчүн кылмыш ишин козгогон. Жергиликтүү бийликтин айтымына караганда, дамба "Сибзолото" холдингине таандык. Маалыматтарда анткен менен бул объектинин эч жерден каттоодон өтпөгөндүгү жана бардык эрежелерди бузуп өз алдынча курулганы айтылууда.
Бул трагедиядан улам, 21-октябрь, дүйшөмбү —Красноярск аймагында аза күтүү күнү деп жарыяланды.
