БИШКЕК, 17-окт. — Sputnik. Эл аралык футбол федерациясынын (FIFA) президенти Жанни Инфантино жакын арада Кыргызстанга келүү ниетин билдиргенин КРдин Футбол федерациясынын маалымат кызматы билдирди.
Кыргызстандагы футбол уюмунун башчысы Канатбек Маматов Монголиядан FIFA президенти Жанни Инфантино менен жолукту. Белгилей кетсек, улуттук команда Улан-Батордо Монголиянын футболчулары менен беттешип, 2:1 эсебинде жеңишке жеткен.
Жетекчилер мындан аркы кызматташуунун жолдорун талкуулап, FIFA башчысы Кыргызстанда футбол өнүгүп жатканын белгилеген.
Маматов ошондой эле Эл аралык футбол федерациясынын социалдык долбоорлор боюнча фондусунун башчысы Юрий Жоркаефф менен жолуккан.
Белгилей кетсек, Жанни Инфантино 2014-жылы Кыргызстанга келген. Ал маалда FIFA президенти Йозеф Блаттер болчу.
