БИШКЕК, 14-окт. — Sputnik. Президент Сооронбай Жээнбеков Казакстандын биринчи президенти Нурсултан Назарбаев менен Бакудан жолукту.
Мамлекет башчынын маалымат кызматынан билдиришкендей, өлкө башчылары Гейдар Алиев атындагы эл аралык аэропортуна келери менен жолугушкан. Азербайжандын борборунда 15-октябрда Түрк тилдүү мамлекеттердин кызматташуу кеңешинин (ТТМКК) жетинчи жыйыны өтөт.
Жээнбеков менен Назарбаев эки тараптуу кызматташтык боюнча пикир алышты.
Жээнбеков Кыргызстан менен Казакстандын ортосундагы стратегиялык өнөктөштүктү, союздаштыкты жана ынак кошуналык мамилени орнотууда Нурсултан Назарбаевдин салымын белгиледи.
Нурсултан Назарбаев болсо кайрадан жолуккандарына кубанычта экенин айтып, мамлекет башчыларынын кызматташууну жана ынак кошуналык мамилелерди тереңдетүүгө багытталган бардык аракеттерин колдой турганын кошумчалады.
