Осмонов: Свердлов районуна жаңы сейил бак куруу үчүн 19 млн. сом бөлүндү
Свердлов районундагы жол маселеси четинен чечилип жатат. Алсак, Ак-Тилек жаңы конушундагы борбордук жол асфальтталды. Аталган аймактын жашоочулары түшүнүү менен мамиле жасап, кызыл сызыктан чыгып кеткен дарбазаларын 2 метр артка жылдырышты. Бул тууралуу Мурат Осмонов Sputnik Кыргызстан радиосунун "Ачык кеп" программасында маек куруп жатып билдирди.
Анын айтымында, аталган райондо 14 конуш бар. Ал жерлерде мектеп, бала бакча жетишсиз. Ак-Бата конушунда жаңы мектеп салыш үчүн муниципалдык жер жок. Ал эми Келечек конушунда жакынкы аралыкта бала бакча куруу пландалууда.
"Калаа башчыбыз шаарды көрктөндүрүүгө өзгөчө көңүл буруп жатат. 90-жылдардан бери Свердлов районунун борбору болгон Чыгыш-5 кичирайону каралбай калган. Ошондон бери жолдор оңдолуп, эс алуучу жайлар салына элек болчу. Мэр Азиз Эмилбекович менен чогуу бул аймакты кыдырып чыгып, көрктөндүрүү керектигин ойлодук. Жаңы сейил багына 19 миллион сом каражат бөлүнгөн. Учурда 50 пайыз иш аткарылды. Кар жааганга чейин жарыктандырып, отургучтарды коюуга үлгүрүп калалы деп жатабыз. Бул иштер октябрь айынын аягына чейин уланат. Эмдиги жылы Чүй проспектисинин 7-апрель көчөсүнөн Түгөлбай Атага чейинки бөлүгүнө, андан ары Төрөкул Айтматов көчөсүнө дейре веложол курууну пландап жатабыз", — деди Осмонов.
Ал бүгүнкү күндө аталган аймак боюнча тогуз айдын ичинде жергиликтүү бюджетке 1 миллиард 331 миллион сом түшүп, план 97 пайызга аткарылганын кошумчалады.
