БИШКЕК, 4-окт. — Sputnik. Индиянын улуттук-боштондук кыймылынын лидери Махатма Гандинин өрттөлгөн сөөгүнүн күлүн уурдап кетишти. Бул туурасында РИА Новости India Today журналына шилтеме кылып кабарлады.
Ганди өлтүрүлгөн 1948-жылдан кийин сөөгү өрттөлүп, ал эми күлү бир нече жерге бөлүнүп сакталган. Анын бири Мадхья-Прадеш штатындагы мемориалда эле.
Окуя Гандинин 150 жылдыгы белгиленип жатканда болгон. Муну жергиликтүү кеңештин башчысы Гурмит Сингх "улут атасына" табынуу үчүн келгенде байкап калган. Вандалдар мемориалдын кире беришине "улуттук саткын" деп жазып да кетишкен.
"Кыязы, бул Гандини өлтүргөн Натхурам Годзени жакшы көргөндөрдөн окшойт. Мындай жек көрүүчүлүк акырындап токтотулушу керек, ал эми полиция тез кыймылдап күнөөлүүлөрдү таап чыгышы зарыл", — деген Сингх.
Гандини 1948-жылы 30-январда радикал-улутчул Натхурам Годзе өлтүргөн. Ал Гандинин саясатын сындап, мусулман элдин пайдасына индуисттердин кызыкчылыгын курмандыкка чалган деген. Годзе кандуу кадамынан кийин өлүм жазасына тартылып, 1949-жылдын ноябрь айында өкүм аткарылган.
