БИШКЕК, 4-окт. — Sputnik. 3-октябрда саат 15:30дар чамасында Маевкадан чыгып Күн-Тууну көздөй бараткан №18 автобустун дөңгөлөгү алдында калып көз жумган баланын кийими темирге кыпчылып калып, бир нече метрге чейин сүйрөлүп барган. Бул тууралуу Чүй облустук милициясынан кабарлашты.
Каргаша тууралуу кечээ белгилүү болгон. Баланын 2008-жылы туулган 5-класстын окуучусу экени айтылды.
Маалыматта бала автобустун алдыңкы эшигинен түшкөндө кийиминин боосу илинип чыкпай калып, автобус бир нече метр жүргөндө арткы дөңгөлөгүнө кирип кеткен. Бул учурда айдоочу окуучунун кыпчылып калганын көргөн эмес.
"Бала №4 шаардык ооруканада эсине келбеген боюнча каза болгон", — деп айтылат маалыматта.
Учурда бардык экспертизалар дайындалып, автобус айып короого токтотулуп, айдоочу кармалды.
