"Арзан турак жай — 2015-2020" программасынын алкагында ушул күнгө чейин 5 миллиард 100 миллион сомго ипотекалык насыя берилди. Бул тууралуу Нуржигит Үсөнакун уулу Sputnik Кыргызстан радиосунун таңкы эфиринде маек куруп жатып билдирди.
Анын айтымында, аталган компания аркылуу 4300дөн ашуун үй бүлө там-таштуу болгон.
"Мамлекеттик кызматкерлерди арзан турак жай менен камсыздоо максатында беш жылдык программа түзүлгөн. 2015-жылдан ушул күнгө чейин 5 миллиард 100 миллион сомго кредит берилди. Буга чейин курулуш компаниялары аркылуу же кардарлар өзү тандап үй алып келсе, эми Мамлекеттик ипотекалык компания өзү курган тамдар Бишкек жана Нарында берилип баштады", — деди Үсөнакун уулу.
Ал мамлекеттик мекемелерде иштебегендер үчүн да турак жайды насыяга берүү аракеттери жүрүп жаткандыгын кошумчалады.
