Алматыда соттолгон экс-депутат Дамирбек Асылбек уулунун иши кайра каралат

БИШКЕК, 20-сен. — Sputnik. Алматы шаарынын кылмыш иштери боюнча сот коллегиясы Жогорку Кеңештин экс-депутаты Дамирбек Асылбек уулунун иши боюнча апелляциялык арызды карайт. Бул тууралуу Sputnik Кыргызстан агенттигине Алматы шаардык сотунун маалымат кызматы билдирди.

19-сентябрда сот экс-депутаттын кылмыш ишин кайтадан кароону чечкен.

"Соттолгондордун баарынын жактоочулары айрым күбөлөр биринчи инстанцияда суралбай калганын айтып, кылмыш ишти кайтадан карап чыгууну суранышкан. Сот отуруму 26-сентябрда өтөт", — дешти соттон.

Дамирбек Асылбек уулунун иши

Эскерте кетсек, 2018-жылдын 15-16-февралында Казакстандын Улуттук коопсуздук комитети Коррупцияга каршы күрөшүү улуттук бюросу менен биргеликте атайын операция жүргүзгөн. Натыйжада бажы постторунда иштеген уюшкан кылмыштуу топтун 8 мүчөсү жок кылынган. Ал эми колго түшүрүлгөндөрдүн арасында ЖК депутаты Дамирбек Асылбек уулу бар экени айтылган. Казакстандын ИИМи анын казак жарандыгы бар экенин айтып чыккан. Бул маалымат Борбордук шайлоо комиссиясынын коңшу өлкөнүн тийиштүү органдарына жиберген сурамынан кийин да тастыкталып, Дамирбек Асылбек уулу депутаттык мандаттан ажыратылган. Дамирбек Асылбек уулуна Казакстандын Кылмыш-жаза кодексинин 264 ("Улуттар аралык кылмыштуу топ түзүү") жана 234-беренеси ("Экономикалык аткезчилик") боюнча кылмыш иши козголгон.

Ал эми 2019-жылы 24-апрелде Алматы шаарынын адистештирилген райондор аралык соту Асылбек уулун 10 жылга эркинен ажыраткан. Соттун өкүмүнө ылайык, ал жаза мөөнөтүн өтөп бүткөн соң Казакстандан чыгарылат.

Дамирбек Асылбек уулу 2015-жылы "Кыргызстан" фракциясынан Жогорку Кеңешке депутат болгон.