БИШКЕК, 19-сен. — Sputnik. Saudi Aramco нефти кендерине кол салууда канаттуу ракеталар менен пилотсуз учкан аба техникалары пайдаланылды деп билдирген Сауд Аравиясынын Коргоо министрлигинин өкүлү Турки аль-Малики. Бул тууралуу РИА Новости жазды.
Анын айтымында, канаттуу жети ракета менен пилотсуз 18 учак чабуул жасаган.
Ал арада йемендик көтөрүлүшчү-хуситтер Saudi Aramco нефти кендерине болгон чабуулда жаңы типтеги пилотсуз учактар пайдаланылгандыгын билдиришкен.
"Аль-Масира" телеканалынын түз эфиринде козголоңчулардын куралдуу күчтөрүнүн өкүлү октолгон үч дрон ар башка үч тараптан коё берилгендигин айтып берген.
Ал чабуул коюлган ишканалардын аймагынан тартылган сүрөттөрдү көрсөтүп, алар (сүрөттөр - ред.) "чалгын кызматынан алынгандыгын" айткан.
"Кол салуу үчүн коё берилген пилотсуз учактар - "Касеф" жана "Саммад — 3" 1,7 чакырым аралыкты басып өтө алышат",— деп кошумчалаган ал.
Хуситтер өкүлү ошол учурда көңүлдү алагды кылуу үчүн сокку урган дрондордон башка дагы учуучу аппараттар колдонулганын айткан.
Эске салсак, өткөн жумада нефть иштеткен Saudi Aramco заводдоруна дрондор менен чабуул жасалып, мунай заттарынын алынышы бир топ кыскарган. Ал аймактарда чыккан өрттү өчүрүп калууга үлгүрүшкөн. Жабыркагандар болгон эмес. Учурда зыян тарткан объектилерди калыбына келтирүү иштери жүрүп жатат.
