БИШКЕК, 12-сен. — Sputnik. Өкмөт башчы Мухаммедкалый Абылгазиев Билим берүү жана илим министрлигинин борбордук аппаратынын жамаатына жаңы дайындалган министр Каныбек Исаковду тааныштырды. Бул тууралуу премьер-министрдин маалымат кызматынан кабарлашты.
Билдирмеде Абылгазиев атаандаштыкка жөндөмдүү заманбап билим берүү системасын түзүү мамлекеттин башкы милдеттеринин бири болуп саналарын белгилеген.
Анын айтымында, билим берүү системасында маанилүү реформаларды ишке ашыруу үчүн маалыматтык-коммуникациялык технологияларды, инновацияларды киргизүү жана инвестиция салууну активдештирүү зарыл.
"Ошондой эле мугалимдердин айлык акысын көбөйтүү, алардын социалдык маселелерин чечүү жана билим берүү мекемелеринде заманбап материалдык-техникалык базаны түзүү жолу менен билим берүүгө мамлекеттик колдоо көрсөтүү зор мааниге ээ. Биз билим берүүгө каражат жумшоо аркылуу келечекке салым кошобуз. Ага жумшалган ар бир сом келечекте ийгиликтүү экономика жана күчтүү социалдык чөйрөнү камсыз кылат", — деген Абылгазиев.
Эске сала кетсек, Каныбек Исаков кечээ, 11-сентябрда, билим берүү жана илим министри болуп дайындалган. Анын талапкерлигин Жогорку Кеңештин 107 депутаты колдоого алган болчу.
