БИШКЕК, 7-сен. — Sputnik. Бишкекте эки кишини аёосуз сабагандардын иши боюнча ШИИБдин кайгуул-күзөт милициясынын эки кенже кызматкери кармалып, командири эркиндикте жүрөт. Бул тууралуу кармалгандардын биринин жактоочусу Жыргалбек Бабаев билдирди.
Адвокаттын айтымында, ал коргоп жаткан кызматкерлердин аракеттеринде кылмыштын курамы жок.
"Кармалгандар экипаждын айдоочусу жана автоматчик. Булар протокол түзүп же тергөөчүнүн суроолоруна жооп бергенге укугу жок. Муну экипаждын командири кылышы керек. Мен коргоп жаткан адамдардын аракетинде кылмыштын курамы жок. Анын үстүнө айдоочу окуя болгон учурда автоунаадан чыккан эмес. Бул тууралуу видеодон көрсө болот", — деди жактоочу.
Бабаевдин айтымында, экипаж мүчөлөрү шектүүлөрдү милиция бөлүмүнө алып келип, нөөмөттөгү кызматкерге өткөрүп бергени видео көзөмөлдө көрүнүп турат. Демек жоопкерчилик ошол адамда. Жактоочу кармалгандардын арасында экипаж командири гана эмес, ИИБдин нөөмөттөгү тергөөчүсү дагы жоктугуна таң калууда.
УКМКнын маалымат кызматы жактоочунун билдирүүсүнө үн ката элек.
Шектүүлөр жана милиционерлер тууралуу
Адамга кол салуу фактысы боюнча Жаныбек Бапышев жана Калысбек Сеитбеков кармалган. Алар милициянын майору Казыбек Бапышевдун бир туугандары.
Укук коргоочулар Жазык кодексинин 320-беренеси ("Кызмат абалынан кыянаттык менен пайдалануу") жана 348-беренеси ("Кылмышты жашыруу") боюнча шектүү катары каралып жатат.
Ички иштер органдарынан билдиришкендей, милициянын майору Казыбек Бапышев иштен алынган. Ал эми 6-сентябрда Бишкек ШИИБдин кайгуул-күзөт милициясынын эки кызматкери кармалган.
