БИШКЕК, 23-авг. — Sputnik. Борбор калаада жөө адамдар өтүүчү чийинден автоунаа 9 жаштагы баланы сүзүп кетти. Бул тууралуу Бишкек шаардык ЖКККББнын маалымат кызматы кабарлады.
Укук коргоо органдарынын маалыматында, кырсык 23-август күнү саат 13:10дор чамасында Юнусалиев (мурдагы Карл Маркс) менен Сүйөркулов көчөлөрүнүн кесилишинде катталган.
"VW Transporter үлгүсүндөгү кичи бустун 29 жаштагы айдоочусу Юнусалиев көчөсү менен түштүк тарапты көздөй баратып, жөө адамдар өтүүчү чийинден 9 жаштагы баланы коюп кеткен. Жабыркаган өспүрүм №3 балдар ооруканасына жеткирилген", — дешти милициядан.
Топтолгон материалдар Бишкек шаардык ички иштер башкармалыгынын жол кырсыктары боюнча тергөө кызматына өткөрүлүп берилген. Унаа айып короого токтотулду.
