БИШКЕК, 18-авг. — Sputnik. Канаданын тургуну 1,5 чакырым бийиктиктен секирип, парашюту ачылбай калган. Бактыга жараша ал жерге аман-эсен түшкөнүн CNN телеканалы билдирди.
Окуя Труа-Ривьер шаарында болгон. Аял асмандан секирип жатканда негизги парашюту ачылбай калган. Кошумча парашютту колдонууга аракет кылганы менен андан да майнап чыккан эмес.
Ал токойдун үстүнө түшүп, парашюту бактарга илинип калган. Дал ушул нерсе анын өмүрүн сактап калган. Анткен менен аялдын бир нече жери сынып, ооруканага жеткирилген.
Дарыгерлердин айтымында, мындай бийиктиктен секирип, парашюту ачылбай калган кишилердин көбү мүрт кетет.
30 жаштагы аял көптөн бери парашюттан секирүү менен алектенип келгени маалымдалды.
