БИШКЕК, 14-авг. — Sputnik. Ички иштер министринин мурдагы орун басары Курсан Асановдун үйү тинтүүгө алынды. Бул туурасында анын адвокаты Икрамидин Айткулов билдирди.
Жактоочунун айтымында, бүгүн, 14-августта, Асанов Аскер прокуратурасына чакырылып, сурак берип чыккан. Ошондой эле жашаган үйү тинтүүгө алынган.
Асановго Кылмыш-жаза кодексинин 320-беренеси - "Кызмат абалынан кыянаттык менен пайдалануу" боюнча кылмыш иши козголуп, сотко чейинки тергөө иштери башталган.
Асанов "кыргыз милициясына чыккынчылык кылды, ишеничтен кетти" деген негиз менен 13-августта ички иштер министринин орун басары кызматынан бошотулган.
Өз кезегинде Асанов мамлекеттин жана өзүнүн абийири алдында таза экенин белгилеген.
Эске салсак, 7-августта УКМКнын атайын даярдыктагы кызматы мурунку президент Алмазбек Атамбаевди кармоо операциясын жүргүзүп, ишке ашпай калган. "Альфанын" жоокерлерине Атамбаевдин тарапташтары катуу каршылык көрсөтүп, ок атылган. Натыйжада спецназдын бир жоокери каза таап, 136 киши жаракат алды.
Эртеси, 8-августта, операцияны ИИМ жүргүзүп, сүйлөшүүлөрдөн кийин Атамбаев багынып берген. Мурдагы президент менен Курсан Асанов сүйлөшүп, багынууга көндүргөн видеосу жарыяланган.
