БИШКЕК, 24-июл. — Sputnik. Жайыл районундагы автоунаа жуучу жайга машинасын калтырган кардардын темир тулпарын айдап кеткен жумушчу жол кырсыгына кабылды. Бул тууралуу Чүй облустук милициясынан кабарлашты.
1-июлда милицияга Кара-Балта шаарынын 53 жаштагы тургуну кайрылып, автоунаа жуучу жайдын кызматкерине чара көрүүнү суранган.
"14-июнда кардар Honda Odyssey автоунаасынын ичин химиялык тазалоо үчүн калтырып, эки күндөн кийин алып кетмек. Бирок машинасын алып кетейин деп келгенде анын сүзүлгөнүн байкаган. Автоунаа жуучу жайдын кызматкери уруксаты жок темир тулпарды айдап чыгып, рулду башкара албай калып кырсыктаган. Учурда машина айып короого токтотулду", — деп айтылат маалыматта.
Аталган факты Кылмыш жана жоруктардын бирдиктүү реестрине катталып, сотко чейинки териштирүү иштери башталды.
Милиция кызматкерлери шектүү катары 28 жаштагы кишини кармап, убактылуу кармоо жайына киргизди.
