ОШ, 16-июл. – Sputnik. Баткен районунун борборунан 100 чакырым алыстыкта жайгашкан Кара-Бак айыл өкмөтүнүн алыскы Зардалы айылынын тургундары 2016-жылы ашар жолу менен башталган көпүрөнү куруп бүтүрүштү. Бул тууралуу Зардалы айылынын тургуну Ураим Дилшатов Sputnik Кыргызстан агенттигине билдирди.
Маалыматка ылайык, Кожешкен дарыясындагы суунун агымы күч болгондуктан, буга чейин салынган 5 көпүрөнү алып кеткен. Ошол себептен 2016-жылы жергиликтүү тургундар ашар жолу менен көпүрө куруу демилгесин колго алып, ага жергиликтүү тургун Ураим Дилшатов жетекчилик кылган.
Өкмөт тарабынан 1,5 млн. сомдук курулуш материалдары берилген.
Кара-Бак айылынын тургуну Абдулашив Мусаевдин айтымында, Бишкек, Москва шаарларында жана Америка, Египет, Бириккен Араб Эмирлигинде, Түркияда иштеп жүргөн баткендик жигиттер көпүрөнүн курулуш иштерине акчалай колдоо көрсөткөн.
Калган жумуштарды эл ашар ыкмасында баштап, узундугу 12 метр болгон көпүрө пайдаланууга берилди.
Агымы күч дарыянын үстүнө көпүрө салуу оңойго турбагандыгына токтолгон жергиликтүү жашоочу Ураим Дилшатов кууш жерге техника да келе албастыгын билдирди.
"Цемент жана башка курулуш материалдарын эшек менен, же болбосо колго көтөрүп ташып жаттык. Ишке катуу киришип, күн сайын 50-60 жергиликтүү тургун таң заардан түн киргенге дейре ынтымак менен иштеп жатышты", — дейт Дилшатов.
Кылдаттык менен темирлерди кураштырып дарыянын аркы жээгине кошкон жергиликтүү уста Ураим Саркаровдун эмгеги бааланып, анын аты көпүрөгө ыйгарылды.
"Архитектуранын чиймеси, долбоору жок туруп көпүрө салуу - бул жомок. Тагыраагы, муну жергиликтүү жигиттердин таланты десек болот", — дейт Зардалы айылынын тургуну Алишер Жээнбеков.
Аска-таштардын арасынан дарыяны бойлой жөө баруучу чыйыр жол гана жергиликтүүлөрдү сырткы дүйнө менен байланыштырып турат. Ал эми көчкү, сел сыяктуу жаратылыш кырсыктары калктын ары-бери каттоосун чектеген учурлар кадимки көрүнүш.
Зардалы айылына жашоочулар мындан 470 жыл мурда отурукташа баштаган. Ал айылдагы элдин кийинки тукумдары азыркы Кара-Бак айылына отурукташып, бирок дагы деле ата конуштарын таштабай келишет.
Буга чейин Sputnik Кыргызстан Баткендин Зардалы айылындагы темир уста Токтоназар Исаев жөнүндө материал даярдаган.
