БИШКЕК, 13-июл. — Sputnik. Кызыл-Кыя шаарында «авиакассаларга кирип, уурулук кылып жүргөн» деп шектелген адам кармалды. Бул тууралуу облустук милициянын маалымат катчысы Дамира Юсупова Sputnik Кыргызстан агенттигине билдирди.
Маалыматка караганда, калаада жайгашкан авиакассалардан акча урдоо боюнча үч факты катталып, жалпысынан 100 миң сомдун тегерегинде зыян алып келген.
Кызыл-Кыя шаардык милициясынын кызматкерлери тарабынан жүргүзүлгөн ыкчам иликтөө иштеринин натыйжасында, кылмышка шектелип Ноокат районунун Көк-Жар айылынын 31 жаштагы тургуну кармалды.
"Ал түн ичинде авиакассалардын имаратынын чатырын бузуп кирип, акчаларды алып жүргөнү айтылды. Шектүү калаадагы базардан колго түшүрүлдү", — деп билдиришти милициядан.
Териштирүү иштеринин жыйынтыгында ал Ноокат районунун аймагында да уурулук жасаганы аныкталды.
Алатан факты Жазыктар кодексинин 200-беренесине ("Уурулук") ылайык Кылмыштардын жана жоруктардын бирдиктүү реестрине катталды.
Учурда шектүү убактылуу кармоо жайында.
