БИШКЕК, 6-июл. — Sputnik. Ысык-Көл облусунда жергиликтүү тургундун автоунаасын тартып алды деген шек менен казакстандык жаран кармалды. Бул туурасында аталган аймактын милициясынан кабарлашты.
Бүгүн, 6-июлда, эртең менен тартип коргоо органдарына Бактуу-Долоноту айылынын 31 жаштагы тургуну арыз менен кайрылган.
"Ал таңкы 5.25тер чамасында ВАЗ-2104 ("Жигули") автокөлүгү менен Бактуу-Долонотудан чыгып, Кара-Ой айылына жүргүнчү жеткирип барган. Машинасындагы адам мас экен. Айтылган жерге жеткенде ал айдоочуну бетке бир уруп, машинасын айдап алып жок болгон", — деп билдиришти милициядан.
"К.С. аттуу шектүү казакстандык жаран болуп чыкты. Ал атайын даярдыктагы отряддын ардагери экен. Автоунааны айдай качкандыгын мойнуна алып, мас болгондугун, ал абалда өзүнүн кылгандарына жооп бербей каларын айтты", — деп билдиришти милициядан.
Материалдар Ысык-Көл облустук милициясынын Тергөө кызматына укуктук баа берүү үчүн тапшырылган.
