БИШКЕК, 5-июл. — Sputnik. Июнь айынын аягына карата Кыргызстандын алтын валюта резервинин көлөмү 2 миллиард 244 миллион 520 миң долларды түздү. Бул туурасында Улуттук банктын расмий сайтында жарыяланды.
Мындай рекорддук көрсөткүч 2014-жылдын июль айында да болуп, анда резервдин көлөмү азыркыдан 18,5 миллион долларга көбүрөөк болгон.
Ал эми май айына салыштырмалуу 73,5 миллион долларга жогорулаган. Башкача айтканда, саатына 102 миң доллардан өсүүдө.
Кыргызстандын эл аралык валюта резервинде валютанын ондон ашуун түрү, СDR (атайын карыз алуу укугу — жасалма резерв жана Эл аралык валюта фондуна төлөө каражат) жана алтын бар. Аларды эл аралык деңгээлде колдонуп, төлөм жүргүзүп, төлөө баланстарынын дефицитин жабуу жана улуттук валютанын курсун турукташтыруу үчүн колдонууга болот.
