Кыргызстандын эмгек кодекси боюнча иштеп жүргөн аялдар кош бойлуулугуна жана төрөгөнүнө байланыштуу 126дан 140 календардык күнгө чейин эмгек өргүүгө чыга алат. Бирок аял тоолуу аймактарда жашаса эмгек өргүүсү 180 күнгө чейин узартылышы мүмкүн.
Биринчи 10 жумушчу күндүк жөлөк пулдун көлөмү айлык акынын 100 пайызын түзүп, иш берүүчүнүн эсебинен төлөнөт. 11-жумушчу күндөн тарта төлөм айына 1000 сом өлчөмүндөгү каражаттын негизинде эсептелет. Бул каражат республикалык бюджеттен төлөнөт.
Эгер аял тоодо же алыскы аймактарда жашаса ага маянасынын 100 пайызы берилет.
Эгер сиз жумуш берүүчү менен келишимдин негизинде иштеп жаткан болсоңуз, жөлөк пул алуу үчүн "ишке жараксыз" деген справка берип коюу жетиштүү. Аны Саламаттык сактоо министрлигинин тийиштүү бөлүмдөрүнөн алууга болот.
Ал эми жеке ишкер болсоңуз. документтердин тизмеси көбөйөт: жөлөк пул алуу боюнча арыз, "ишке жараксыз" деген кагаз, паспорттун көчүрмөсү, жеке ишкер катары катталган же кайра катталган документтин же патенттин көчүрмөсү керектелет.
Эгер дыйкан чарбасына мүчө болсоңуз, паспорт менен "ишке жараксыз" деген кагаздын көчүрмөсүнөн сырткары төмөнкү документтер керектелет: жерди пайдаланууга уруксат берген күбөлүктүн көчүрмөсү, дыйкан чарба башчысынын чарбага мүчө экениңизди тастыктаган справкасы, жеке ишкер катары катталган же кайра катталган күбөлүктүн көчүрмөсү.
Баса, жөлөк пул кош бойлууларга гана эмес, башка кызматкерлерге дагы каралган. Кененирээк Sputnik Кыргызстан агенттигинин материалынан таанышыңыз.
