БИШКЕК, 20-июн. — Sputnik. Жакынкы эки-үч күндө өлкөнүн көпчүлүк аймактарында мезгили менен жаан жаап, күн күркүрөп, бийик тоолуу райондордо кар жаашы күтүлөт. Бул туурасында Өзгөчө кырдаалдар министрлигинен (ӨКМ) кабарлашты.
ӨКМдин маалыматы боюнча, аба ырайы 22-июнда күндүз жана 23-июнда түнкүсүн бузулат.
Мындай туруксуз аба ырайы айыл чарба иштерин, унаа, энергетика жана коммуналдык кызматтардын ишин жана жайыттарда мал кармоону кыйындатары белгилегенген.
Нөшөрлүү жаан-чачынга байланыштуу Ош, Жалал-Абад жана Баткен облустарынын тоолуу жана тоо этектериндеги райондорунда сел жүрүшү мүмкүн экендиги айтылды.
Мындан улам жергиликтүү калктын жана мекемелердин, ишканалардын, уюмдардын жардамы менен арыктарды, суу өткөрүү түтүктөрүн, ошондой эле дренаждык түйүндөрдү тазалоо иш-чараларын жүргүзүү зарыл экендиги кошумчаланган.
