Текшерүүнүн негизинде мамлекет тарабынан жашылдандырууга берилген объектилерде өзүм билемдик менен жайкы кафелерди куруп алгандар көп чыгып жатат. Бул тууралуу Талант Иманакун уулу Sputnik Кыргызстан радиосунун "Ачык кеп" программасында маек куруп жатып билдирди.
Анын айтымында, эгерде мыйзамсыз салынган объект шаардын архитектуралык нормасына жооп бере турган болсо, ижара акысын төлөп ишин уланта берсе болот.
"Акыркы эки жылда дээрлик 10 миңден ашык мыйзамсыз жайлар жок кылынды. Азыркы учурда кытайлык гранттын негизинде жолдор салынууда. Мында да ар кандай мыйзамсыз салынган объектилер тоскоолдук кылган учурлар жок эмес. Мыйзамсыз курулган объектилердин көбү 2000-жылдарга туура келет. Быйыл Бишкек боюнча 3500 күркө аныкталып, анын ичинен 1200ү мыйзамсыз болуп чыкты. Бүгүнкү күндө эл дагы муну туура көрүп, мыйзамсыз жайлар баары бир жок кылынарын сезип, жоопкерчилик менен мамиле кылып калышты. Биздин негизги максат — борборубузду мыйзамсыз салынган объектилерден тазалоо", — деди Иманакун уулу.
Ошондой эле ал азыркы учурда өзүм билемдик менен мыйзамсыз курулуш тургузуп алган жерлерге кескин түрдө чаралар көрүлүп жатканын кошумчалады.
