БИШКЕК, 3-июн. — Sputnik. Эртең, 4-июнда, Республикалык кан борборунун колдоосу менен "Кан тапшырып адам өмүрүн сакта" аттуу акция өтөрүн уюштуруучулар билдиришти.
Бул иш-чара алты жылдан бери онкологиялык жана гематологиялык ооруларга кабылган балдарды колдоо максатында өткөрүлүп келет. Дагы бир максаты — кандын запасын топтоо.
Уюштуруучулар билдиришкендей, дени сак ар бир каалоочу кан тапшырып, балдардын өмүрүн сактап калууга салым кошо алат. Ошондой эле жарандар инфекциянын бар-жогун бекер текшертип, канынын тобун биле алышат.
Кан топтоо ишин Республикалык кан борборунун мобилдик лабораториясы аткарат. Иш-чара саат 9.00дөн 14.30га чейин Абдрахманов, 191 дарегинде болот.
Донорлорго болгон талап:
- Дени сак;
- 50 килограммдан кем эмес салмак;
- 18ден 60 жашка чейинки жаш курак.
- Кан тапшырар күнү сүт жана ичимдик ичүүгө, майлуу тамак жегенге болбойт.
