Кыргызстанда суучул-куткаруучуларды окутуу программасы эл аралык стандарттарга шайкеш келип, берилчү сертификат чет мамлекеттерде ишке орношууга да жарактуу. Бул тууралуу Урматбек Шамырканов Sputnik Кыргызстан радиосунун эфиринде маек куруп жатып билдирди.
Анын айтымында, аталган адистикке окутуу борбор калаада жана Чолпон-Атада жүргүзүлөт.
"Окутуу эки этапта жүрөт. Өкмөттүк жана муниципалдык көлмө, бассейндердин куткаруучулары биринчи этап менен акысыз окушат. Ал эми менчик пляждын суучул-куткаруучуларын окутуу наркы 3400 сом. Окутуу убактысы 12 иш күнү. Бул аралыкта биздин дасыккан педагогдор сууга түшүү убагында суучул-куткаруучуларга тиешелүү болгон бардык инструкцияларды үйрөтүшөт. Окууну каалагандар 18 жаштан 35 жашка чейинки, ден соолугунун бекемдигин тастыктаган 082 справкасы бар КР жараны болуусу зарыл. Мындан сырткары, 3х4 өлчөмүндөгү эки сүрөт жана иштеген жеринен ушул курска жиберген жолдомо каты керектелет. Ал эми жеке жактар өзүнүн арызынын негизинде кабыл алынат. Учурда документтер топтомун электрондук түрдө министрликтин сайты аркылуу да тапшырса болот", — деди Шамырканов.
Ал ошондой эле сууда сүзүү эрежелерин билип алууну каалаган мектеп окуучулары да кабыл алынарын кошумчалады.
