БИШКЕК, 22-май — Sputnik. Президент Сооронбай Жээнбеков бүгүн, 22-майда, Россиянын тышкы иштер министри Сергей Лавров менен жолукту. Бул тууралуу мамлекет башчынын аппаратынан кабарлашты.
Лавров Бишкекке ШКУнун жана ЖККУнун тышкы иштер министрлеринин кеңешинин кезектеги жыйындарына катышуу үчүн келген.
Өлкө башчы менен министр эки тараптуу кызматташтыктын учурдагы абалы жана артыкчылыктуу багыттарын талкуулашты.
Сооронбай Жээнбеков Владимир Путиндин Кыргызстанга болгон мамлекеттик сапары кыргыз-орус мамилелерин жаңы деңгээлге көтөргөнүн белгиледи.
"Аймактар аралык конференциянын алкагында 6 миллиард доллардан ашык суммага, 53төн ашуун келишимге кол коюлду. Ректорлор форумунун алкагында жогорку окуу жайлардын ортосундагы мындан аркы кызматташуунун келечеги белгиленди. Кыргызстанда МГУнун филиалын ачуу макулдашылды. Региондор аралык байланыштарды, ошондой эле жаштар саясатын бекемдөө боюнча пландар белгиленди", — деди Жээнбеков.
Ал эми Россиянын тышкы иштер министри Сергей Лавров президент Сооронбай Жээнбековго Россия президенти Владимир Путиндин каалоо-тилектерин жолдоп, меймандостугу жана жылуу кабыл алуусу үчүн ыраазычылык билдирди.
