БИШКЕК, 17-май — Sputnik. Кыргызстандын ШКУга кирген өлкөлөр менен товар жүгүртүү көлөмү өлкөнүн жалпы товар жүгүртүүсүнүн 71 пайызын түзөт. Бул тууралуу премьер-министр Мухаммедкалый Абылгазиев "ШКУ: Кызматташтыктын чегин кеңейтүү" бизнес-форумунун жүрүшүндө билдирди.
"Сандарга кайрылсак, 2018-жылы биздин өлкөнүн товар жүгүртүүсү 6,7 миллиард долларды түзгөн. Ошол эле учурда ШКУ өлкөлөрү менен 4,7 миллиард долларды түзгөн, бул товар жүгүртүүнүн жалпы көлөмүнүн 71 пайыздык көлөмү. Ал эми импорт 13 пайыз, экспорт 11 пайыз өскөн", — деди Абылгазиев.
"2018-жылы Кытайдан түз инвестициялардын көлөмү 245,4 миллион долларды түзгөн, Россиядан 154,4 миллион доллар келген. Пакистандан 8,9 миллион доллар тартылган, бул 2017-жылга караганда 2,3 эсе көп", — деди өкмөт башчысы.
Абылгазиев ШКУга мүчө өлкөлөрдүн бизнес-коомчулук өкүлдөрүнүн катышуусундагы кооперациялык биржа форматындагы форумдун жыйынтыгы боюнча 2 миллиард доллардан ашуун документтерге кол коюларын билдирди.
