БИШКЕК, 29-апр. — Sputnik. Бүгүн Улуттук банк Россиядан Кыргызстанга акча которуу боюнча чектөөлөр киргизилгенин жар салды.
Маалыматка кылайык, 16-апрелден тарта коммерциялык банктарга "Золотая корона — денежные переводы" кызматы аркылуу которулган акча 100 миң рублден (108 миң сом) ашпашы керек.
Россиялык ЖМКлар өз булактарына таянып, мындай жол менен көмүскө экономика, анын ичинде каттоосу жок ишкерлик менен күрөшүү жүрүп жатканын жазышты.
Sputnik Кыргызстан агенттиги адистерден мындай өзгөрүүлөр мигранттарга жана Кыргызстандын экономикасына кандай таасир этерин сураштырды.
Кыргызстандын Улуттук банкы киргизилген чектөөлөр эмгек мигранттарынын которгон акчасына таасирин өтө деле тийгизбейт деген пикирде. Мекеменин баалоосуна таянсак, жеке тараптар которгон акчанын суммасы орточо эсеп менен алганда 400-500 долларды гана түзөт.
Финансист Искендер Шаршеевдин пикиринде, аталган чектөө акчасын Кыргызстанга жеке тарап катары которгон ишкерлерди убара кылышы мүмкүн.
"Жеке тараптарга банктын кызматын пайдалануу дайыма арзаныраак. Анткени бизнеске тиешелүү каражат которууда банк аларга кымбатыраак пайыздарды коюшат. Андыктан, көптөгөн ишкерлер экспорт жана импорт операцияларын жеке тарап катары жүргүзүшөт. Демек аларга тоскоолдук жаралат", — деди Шаршеев.
Анткен менен финансист "ишкерлер бул жагдайда дагы өз ыңгайын табышат" деген ойдо.
Ал эми Рыноктор ассоциациясынын президенти Сергей Пономарев бул өзгөрүү бизнесин таза жүргүзгөндөргө көлөкөсүн түшүрбөйт деп ишендирди.
"Таза ишкерлик кылгандар каалаган суммадагы акчасын эч тоскоолдуксуз которо алат. Өзгөчө өнөктөшү менен келишим болсо, ал документти көрсөтүп, миллиондогон акчаларды которот. Бул жерден таза кирешесин көрсөтпөгөн ишкерлерге татаал болуп калышы мүмкүн. Тагыраагы, көмүскө экономика чындап жабыркайт", — деди Пономарев.
Адистин айтымында, негизги стратегиялык өнөктөш болгон өлкөнүн ичиндеги мындай реформаларга биз түшүнүү менен карап, туура кабыл алышыбыз зарыл.
"Анүстүнө азыркыдай терроризм, экстремизм күч алып турган заманда Россия өз аймагынан чыгып жаткан акча асыл максаттарда жумшалышына аракет кылып жатат", — деди ассоциация президенти.
Акырында чектөө киргизген тараптын жүйөсүн уктук.
РИА Новостинин айтымына караганда, 100 миң рублдик чектөө "Золотая корона — денежные переводы" системасы үчүн эле эмес, Western Union боюнча да киргизилген.
Былтыр жарыяланган россиялык маалыматтарда Россиядан Кыргызстанга 2,4 миллиард доллар, ал эми кыргызстандык маалыматтарда 2,6 миллиард доллар экени айтылган.
