БИШКЕК, 26-апр. — Sputnik. Санкт-Петербург шаарындагы мейманканалардын биринин имаратын бузуу маалында 36 жаштагы кыргызстандык кокустуктан урап кеткен топурактын алдында калып каза болду. Бул тууралуу Кыргызстандын Россиядагы элчилигинен билдиришти.
Окуя болгон жерге Кыргызстандын Санкт-Петербург шаарындагы ардактуу консулу барган.
"Каза болгон жаран Ош облусунун Кара-Суу районунун 1982-жылы 9-апрелде туулган тургуну Н.О. экендиги такталган", — деп айтылат маалыматта.
Жарандын сөөгү урандынын алдынан 26-апрелде чыгарылган. Азыркы кезде элчиликтин Санкт-Петербургдагы консулдугу маркумдун туугандарына керектүү жардамдарды көргөзүүдө.
