БИШКЕК, 24-апр. — Sputnik. Жогорку Кеңештеги "Кыргызстан" фракциясынын депутаты Канатбек Исаев партиялашы Дамирбек Асылбек уулунун Казакстанда соттолушу боюнча пикирин Sputnik Кыргызстан агенттигинин кабарчысына билдирди.
Белгилей кетсек, Алматы шаардык соту Асылбек уулун улуттар аралык кылмыштуу топ түзүү, экономикалык аткезчилик беренелери боюнча күнөөлүү деп таап, 10 жылга эркинен ажыраткан өкүм чыгарган.
Исаев өз сөзүндө соттун мындай өкүмү алар үчүн абдан өкүнүчтүү болгонун айтты.
"Биздин фракциянын депутаттары, партиялаштар кезек менен сот отурумдарына катышып жаттык. Соттук териштирүү учурунда Дамирбектин эч кандай күнөөсү жок экени ачыктан-ачык эле көрүнүп калды. Ал юрист эмес, жөнөкөй адамга деле түшүнүктүү болду. Аткезчилик менен чогуу алектенген деген балдар сотто Дамирбек менен жолугуп, таанышып жатат. Алар биринчи жолу бири-бирин көрүп жатса, анан кантип уюшулган эл аралык топ болот? Бул саясий маселе экени көрүнүп калды. Анткени учурунда мурдагы президент Алмазбек Атамбаев коңшу мамлекеттин жетекчилиги менен мамилесин бузуп алган, мындан улам жалпы алака да бузулган. Дамирбек эл аралык мамиленин курмандыгы болуп калды деп түшүнөм", — деди Исаев.
Ал ошондой эле мындан ары да Дамирбек Асылбек уулуна колдон келген жардам берилерин, бирок ал башка мамлекетте болгондуктан тоскоолдуктар болуп жатканын кошумчалады.
Эскерте кетсек, 2018-жылдын 15-16-февралында Казакстандын Улуттук коопсуздук комитети Коррупцияга каршы күрөшүү улуттук бюросу менен биргеликте атайын операция жүргүзгөн. Натыйжада бажы постторунда иштеген уюшкан кылмыштуу топтун 8 мүчөсү жок кылынган. Ал эми колго түшүрүлгөндөрдүн арасында ЖК депутаты Дамирбек Асылбек уулу бар экени айтылган. Казакстандын ИИМи анын казак жарандыгы бар экенин айтып чыккан. Бул маалымат Борбордук шайлоо комиссиясынын коңшу өлкөнүн тийиштүү органдарына жиберген сурамынан кийин да тастыкталып, Дамирбек Асылбек уулу депутаттык мандаттан ажыратылган.
