БИШКЕК, 4-апр. — Sputnik. Сауд Аравиясында өткөн "Төө фестивалына" (Camel Fest) катыштыруу үчүн Кыргызстандан чыгарып кеткен 14 топоз бир жылга ал жакта калтырылды. Бул туурасында Дүйнөлүк этнооюндар конфедерациясынан кабарлашты.
Аталган фестивалга көчмөн элдин маданиятын чагылдыруу үчүн 14 топоз, 15 тайган, 15 бүркүт, 5 ителги жана 4 куш алып кетишкен.
Конфедерация атайын рейс менен бүгүн түнү "Көчмөндөр ааламы" фестивалына катышкан жаныбарларды Сауд Аравиядан кайра Кыргызстанга алып келинерин кабарлап, бирок кээ бир жаныбарлар бир жылга калтырылгандыгын маалымдады.
"Кыргызстанга тайгандар менен куштар келет. Ал эми топоздор Сауд Аравиясында 2020-жылдын мартында өтө турган кийинки иш-чарага чейин кала турган болду. Муну аталган фестивалды өткөргөн өнөктөштөр суранды. Учурда Camel Club бул жаныбарларды кантип багып, кантип жем-чөп берүүнүн жол-жобосун сурап кайрылды", — деп айтылат маалыматта.
Маалымат иретинде айтсак, Camel Fest фестивалы 9-23-март күндөрү Эр-Рияд шаарында өттү. Анда 98 мамлекеттин өкүлдөрү маданият жана спорт жаатында өнөрүн тартуулаган. Ага 1000ден ашуун кыргызстандык катышып, "Көчмөндөр ааламы" деп аталган этнофестивалын көрсөтүштү. Кыргызстандан барган делегацияга атайын 15 гектар жер берилип, ипподром, этнобазар жана көчмөндөр айылы курулган. Ошондой эле катышуучулардын тамак-ашы, жаткан жери беленделип, мал-жаны багылган. Кеткен чыгымдын баарын уюштуруучулар көтөргөн.
