БИШКЕК, 28-мар. — Sputnik. Кыргызстандын Куралдуу күчтөрүнүн генералдык штабы менен Россиянын Коргоо министрлиги маанилүү протоколго кол койгонун штабдын башчысы Райымберди Дүйшөмбиев журналисттерге билдирди.
Анын айтымында, жаңы протоколдун Кыргызстанга тийгизген пайдасы абдан көп.
"Бул протоколдун негизинде Кыргызстандын аскер кызматкерлери Россиянын аскерлери менен бирдикте өзү учуучу аппараттарды колдонгондү үйрөнүшөт. Бул Кыргызстандын коопсуздугун камсыздоого, ошондой эле биздеги Россиянын базасын кайтарууга керек. Андан сырткары, Россия менен Кыргызстан колдонуп келген учуучу тилкелер модернизацияланат", — деди ал.
Дүйшөмбиев, андан сырткары, Россия "Кант" авиабазасынын жер акысына көбүрөөк акча төлөй турганын кошумчалады.
Куралдуу күчтөрдүн Генералдык штабынын жетекчисинин айтымында, учурда Кыргызстандын 500дөн ашык аскер кызматкери Россиянын Коргоо министрлигинин жогорку аскер окуу жайларында бекер окуп жатканын белгиледи. Дүйшөмбиев ошондой эле өз сөзүндө Россия дайыма аскердик-техникалык жардам берип келерин, ошонун негизинде Кыргызстан курал-жарак, аскердик техника менен камсыз болуп жатканын баса белгиледи.
